ಪಾಲಕ್ ಚಪಾತಿ / Palak Chapati




ಬೇಕಾಗುವ ಸಾಮಗ್ರಿಗಳು

ಗೋದಿಹಿಟ್ಟು 1 ಕಪ್
ಪಾಲಕ್ 1 ಕಟ್ಟು
೪-೬ ಹಸಿಮೆಣಸಿನಕಾಯಿ
೨ ಟೀಸ್ಪೂನ್ ಜೀರಿಗೆ
ಕೊತ್ತಂಬರಿಸೊಪ್ಪು ಸ್ವಲ್ಪ
1 ಟೀಸ್ಪೂನ್ ಅರಿಸಿನ
ಸ್ವಲ್ಪ ಇಂಗು
ಸ್ವಲ್ಪ ಎಣ್ಣೆ

ಮಾಡುವ ವಿಧಾನ

ಮೊದಲು ಹಸಿಮೆಣಸಿನಕಾಯಿ, ಜೀರಿಗೆ, ಕೊತ್ತಂಬರಿಸೊಪ್ಪು,ಅರಿಸಿನ, ಇಂಗು ಇವುಗಳನ್ನು ನುಣ್ಣಗೆ ರುಬ್ಬಿಕೊಳ್ಳಿ. ನಂತರ ಚೆನ್ನಾಗಿ ತೊಳೆದ ಪಾಲಕನ್ನು ಸಣ್ಣಗೆ ಹೆಚ್ಚಿ 1 ಟೀಸ್ಪೂನ್ ಎಣ್ಣೆ ಹಾಕಿ ಸ್ವಲ್ಪ ಹುರಿಯಿರಿ. ಆಮೇಲೆ ಗೋದಿಹಿಟ್ಟು, ರುಬ್ಬಿಟ್ಟಿರುವ ಮಸಾಲೆ, ಉಪ್ಪು, ಹುರಿದುಕೊಂಡಿರೋ ಪಾಲಕ್ ಎಲ್ಲ ಸೇರಿಸಿ ಚನ್ನಾಗಿ ನಾದಿ ಚಪತಿ ಹಿಟ್ಟಿನ ಹದಕ್ಕೆ ಕಲಸಿಕೊಳ್ಳಿ. ನಂತರ ಚಪಾತಿ ಲಟ್ಟಿಸಿ ಬೇಯಿಸಿದರೆ ಪಾಲಕ್ ಚಪಾತಿ ರೆಡಿ.

ಉದ್ದಿನಬೇಳೆ ಮಸಾಲ / Urid Dal Masala




ಬೇಕಾಗುವ ಸಾಮಗ್ರಿಗಳು

1 ಕಪ್ ಉದ್ದಿನಬೇಳೆ (1 ಘಂಟೆ ನೆನೆಸಿ ಚನ್ನಾಗಿ ತೊಳೆದುಕೊಳ್ಳಬೇಕು)
2 ಈರುಳ್ಳೀ
1 ಟೊಮ್ಯಾಟೊ
1 ಇಂಚು ಶುಂಠಿ
4-5 ಬೆಳ್ಳುಳ್ಳಿ ಹಿಲ್ಕು
2 ಹಸಿ ಮೆಣಸಿನಕಾಯಿ
1 ಟೀಸ್ಪೂನ್ ಕಾರದ ಪುಡಿ
1 ಟೀಸ್ಪೂನ್ ಗರಮ್ ಮಸಾಲೆ / ಚೋಲೆ ಮಸಾಲೆ
2 ಟೀಸ್ಪೂನ್ ಅರಿಸಿನದಪುಡಿ
ರುಚಿಗೆ ತಕ್ಕಷ್ಟು ಉಪ್ಪು
ಸ್ವಲ್ಪ ಬೆಲ್ಲ

ಮಾಡುವ ವಿಧಾನ

ಮೊದಲು ಒಂದು ದಪ್ಪ ತಳದ ಪಾತ್ರೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ತೊಳೆದ ಉದ್ದಿನಬೇಳೆ ಮತ್ತೆ ಅರಿಸಿನದಪುಡಿ ಹಾಕಿ ಸ್ವಲ್ಪ ಫ್ರೈ ಮಾಡ್ಕೊಬೇಕು, ಅದು ಸ್ವಲ್ಪ ಫ್ರೈ ಅದಮೇಲೆ ಅದಕ್ಕೆ ಸ್ವಲ್ಪ ನೀರು ಹಾಕಿ ಬೇಯಿಸಿಕೊಳ್ಳಬೇಕು .ಉದ್ದಿನಬೇಳೆ ಬೇಯೋ ಹೊತ್ತಿಗೆ ಒಂದು ಬಾಣಲೆಯಲ್ಲಿ ಸ್ವಲ್ಪ ಎಣ್ಣೆ ಹಾಕಿ ಅದಕ್ಕೆ ಹೆಚ್ಚಿದ ಈರುಳ್ಳೀ,ಬೆಳ್ಳುಳ್ಳಿ,ಹಸಿ ಮೆಣಸಿನಕಾಯಿ, ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಶುಂಠಿ ಹಾಕಿ ಹೊಂಬಣ್ಣ ಬರುವತನಕ ಹುರಿಬೇಕು ನಂತರ ಅದಕ್ಕೆ ಟೊಮ್ಯಾಟೊ ಮತ್ತೆ ಮಿಕ್ಕ ಮಸಾಲೆ ಹಾಕಿ ಸ್ವಲ್ಪ ಹೊತ್ತು ಫ್ರೈ ಮಡಿ ಇವಾಗ ಮಸಾಲೆ ರೆಡಿ ಆಗಿದೆ, ರೆಡಿ ಆಗಿರೋ ಮಸಾಲೆಗೆ ಬೆಂದ ಉದ್ದಿನಬೇಳೆ ಹಾಕಿದರೆ ಉದ್ದಿನಬೇಳೆ ಮಸಾಲ ರೆಡಿ.

ಹುಳಿಪುಡಿ / Sambar Masala Powder

ಬೇಕಾಗುವ ಸಾಮಗ್ರಿಗಳು

¼ ಕೇಜಿ ಕೊತ್ತಂಬರಿಬೀಜ
¼ ಕೇಜಿ ಬ್ಯಾಡಗಿಮೆಣಸಿನಕಾಯಿ
25 ಗ್ರಾಂ ಜೀರಿಗೆ
1 ಜಾಯಿಕಾಯಿ
25-50 ಗ್ರಾಂ ಚಕ್ಕೆ
6 ಏಲಕ್ಕಿ
200 ಗ್ರಾಂ ಕಡಲೆಬೇಳೆ
50 ಗ್ರಾಂ ಉದ್ದಿನಬೇಳೆ
ಸ್ವಲ್ಪ ಇಂಗು
ಮೆಂತ್ಯ 1 ಟೀಸ್ಪೂನ್

ಮಾಡುವ ವಿಧಾನ

ಮೇಲೆ ಹೇಳಿರುವ ಸಾಮಾನುಗಳನ್ನು ಒಂದೊಂದಾಗಿ ಹುರಿದು ಅದನ್ನು ಚನ್ನಾಗಿ ಪುಡಿ ಮಾಡಿದರೆ ಹುಳಿಪುಡಿ ರೆಡಿ.

ಸಾರಿನ ಪುಡಿ / Rasam Masala Powder

ಬೇಕಾಗುವ ಸಾಮಗ್ರಿಗಳು

¼ ಕೇಜಿ ಕೊತ್ತಂಬರಿಬೀಜ
¼ ಕೇಜಿ ಬ್ಯಾಡಗಿಮೆಣಸಿನಕಾಯಿ
1೦೦ ಗ್ರಾಂ ಜೀರಿಗೆ
25 ಗ್ರಾಂ ಸಾಸಿವೆ
12 ಗ್ರಾಂ ಕಾಳುಮೆಣಸು
ಸ್ವಲ್ಪ ಇಂಗು
ಮೆಂತ್ಯ ಸ್ವಲ್ಪ

ಮಾಡುವ ವಿಧಾನ
ಮೇಲೆ ಹೇಳಿರುವ ಎಲ್ಲಾ ಸಾಮಗ್ರಿಗಳನ್ನು ಒಂದೊಂದಾಗಿ ಹದವಾಗಿ ಹುರಿದು ಚೆನ್ನಾಗಿ ಪುಡಿ ಮಾಡಿದರೆ ಸಾರಿನ ಪುಡಿ ರೆಡಿ

ಜೀರಿಗೆ ತಂಬ್ಳಿ / Jeera Tambuli / Jeera Raita


ಬೇಕಾಗುವ ಸಾಮಗ್ರಿಗಳು
2 ಟೀ ಸ್ಪೂನ್ ಜೀರಿಗೆ
ಅರ್ದ ಕಪ್ ತೆಂಗಿನತುರಿ
4-8 ಕಾಳು ಮೆಣಸು
ಮೊಸರು
ರುಚಿಗೆ ತಕ್ಕಸ್ಟು ಉಪ್ಪು
ಸ್ವಲ್ಪ ಬೆಲ್ಲ
ಒಗ್ಗರಣೆಗೆ :- ತುಪ್ಪ,ಸಾಸಿವೆ,ಇಂಗು ಮತ್ತು ಉದ್ದಿನಬೇಳೆ
ಮಾಡುವ ವಿಧಾನ
ಮೇಲೆ ಹೇಳಿರುವ ಎಲ್ಲ ಸಾಮಗ್ರಿಗಳನ್ನು ಚೆನ್ನಾಗಿ ರುಬ್ಬಿಕೊಂಡು ( ಮೊಸರು,ಮತ್ತು ಒಗ್ಗರಣೆ ಸಾಮಗ್ರಿಬಿಟ್ಟು) ಮೊಸರಿಗೆ ಸೇರಿಸಿ ಒಗ್ಗರಣೆ ಹಾಕಿದರೆ ಜೀರಿಗೆ ತಂಬ್ಳಿ ರೆಡಿ.

ಸಜ್ಜೆ ರೊಟ್ಟಿ / Sajje Rotti / Bajra Roti

ಹೆಚ್ಚಿನ ಸಾಮನು ಕೇಳದ ಆದರೆ ಸಹನೆ ಮತ್ತು ಸಮಯ ಎರಡನ್ನೂ ಬಯಸುವ ಸಜ್ಜೆ ರೊಟ್ಟಿ ಮಾಡುವ ವಿಧಾನ.
ಬೇಕಾಗುವ ಸಾಮಾನುಗಳು:
ಸಜ್ಜೆ ಹಿಟ್ಟು – ೨ ಬಟ್ಟಲು
ಉಪ್ಪು – ೧/೪ ಚಮಚ
ಬಿಸಿನೀರು – ೧.೨೫ ಬಟ್ಟಲು.
ಮಾಡುವ ವಿಧಾನ:
ಸಜ್ಜೆ ಹಿಟ್ಟಿಗೆ ಉಪ್ಪು, ಬಿಸಿನೀರು ಹಾಕಿ ಚನ್ನಾಗಿ ಕಲೆಸಿ, ನಾದಿಕೊಳ್ಳಿ. Gluten ಎಂಬ ಪದಾರ್ಥ ಸಜ್ಜೆಹಿಟ್ಟಿನಲ್ಲಿ ಕಮ್ಮಿಯಾಗಿರುವುದರ ಪರಿಣಾಮವಾಗಿ ಕಲೆಸಿಕೊಂಡ ಹಿಟ್ಟು ಚಪಾತಿ ಹಿಟ್ಟಿನಂತೆ ಮೃದುವಾಗಿರುವುದಿಲ್ಲ. ಹೀಗೆ ಕಲಸಿದ ಹಿಟ್ಟನ್ನು ಒಂದು ಒದ್ದೆಬಟ್ಟೆಯಲ್ಲಿ ಕಟ್ಟಿ ಅರ್ಧಗಂಟೆ ಇಡಿ.
ಅರ್ಧಗಂಟೆಯ ನಂತರ ಕಲೆಸಿದ ಹಿಟ್ಟನ್ನು ಸಣ್ಣ ಹಿಟ್ಟಿನ ಉಂಡೆಗಳಾಗಿ ಮಾರ್ಪಡಿಸಿ. ಹಳೆಯ ಸಂಪ್ರದಾಯದ ಪ್ರಕಾರ ಸಜ್ಜೆರೊಟ್ಟಿಯನ್ನು ಕೈಯಲ್ಲೆ ತಟ್ಟಿ ಮಾಡಬೇಕು (ಜೋಳದ ರೊಟ್ಟಿಯ ತರ). ಆ ರೀತಿ ಕಷ್ಟ ಅನಿಸಿದರೆ, ಹಿಟ್ಟಿನ ಉಂಡೆಯನ್ನು ೨ ಪ್ಲಾಸ್ಟಿಕ್ ಹಾಳೆಗಳ ಮಧ್ಯ ಇಟ್ಟು ಚಪತಿಯಂತೆ ಲಟ್ಟಿಸಿಕೊಳ್ಳಬಹುದು. ಕೈಯಲ್ಲೆ ರೊಟ್ಟಿ ತಟ್ಟುವುದಾದರೆ ಕೈಗೆ ನೀರನ್ನು ಹಚ್ಚಿಕೊಂಡು ತಟ್ಟಿದರೆ ಸುಲಭವಾಗುತ್ತದೆ.
ಒಂದು ಕಾವಲಿಯನ್ನು (ತವಾ/ಹೆಂಚು) ಒಲೆಯ ಮೇಲಿಟ್ಟು ಬಿಸಿಮಾಡಿಕೊಳ್ಳಿ. ಕಾವಲಿ ಕಾದನಂತರ ಲಟ್ಟಿಸಿಕೊಂಡ ರೊಟ್ಟಿಯನ್ನು ಅದರಮೇಲೆ ಹಾಕಿ. ಚಪಾತಿಗೆ ಎಣ್ಣೆ ಸವರುವಂತೆ ಬೇಯುತ್ತಿರುವ ರೊಟ್ಟಿಯ ಮೇಲೆ ನೀರನ್ನು ಸವರಿ, ರೊಟ್ಟಿಯ ಎರಡೂ ಕಡೆ ಬೇಯಿಸಿಕೊಳ್ಳಿ. ಒಂದು ರೊಟ್ಟಿ ಚನ್ನಾಗಿ ಬೇಯಲು ೩ ನಿಮಿಷ ಸಾಕಾಗುತ್ತದೆ.
ಬಿಸಿ ಬಿಸಿ ಸಜ್ಜೆ ರೊಟ್ಟಿಯ ಜೊತೆ ನೆಂಚಿಕೊಳ್ಳಲು ಬೆಳ್ಳುಳ್ಳಿ ಚಟ್ನಿ ಮತ್ತು ಬೆಣ್ಣೆ ಬಳಸಿ.

ಸಲಹೆ: ಹಿಟ್ಟನ್ನು ಮೃದುವಾಗಿಸಲು ೧/೨ ಬಟ್ಟಲು ಗೋದಿಹಿಟ್ಟನ್ನು ಬಳಸಬಹುದು.

ಮೆಂತ್ಯ ಥೇಪ್ಲ / Menthya Thepla / Methi Thepla

೨-೩ ದಿನಗಳ ಕಾಲ ಹಾಳಾಗದೆ ಇರುವ ಅದ್ಭುತ ರುಚಿಯ
ಗುಜರಾತಿ ತಿಂಡಿ.

ಬೇಕಾಗಿರುವ ಸಾಮಾನುಗಳು
1 ಕಪ್ ಗೋದಿಹಿಟ್ಟು
1 ಕಪ್ ಸಜ್ಜೆ ಹಿಟ್ಟು(ಮಿಲೆಟ್ ಫ಼್ಲೊರ್)
1 ಕಟ್ಟು ಬಿಡಿಸಿ ತೊಳೆದ ಮೆಂತ್ಯ ಸೊಪ್ಪು
1/2 ಕಪ್ ಮೊಸರು
3 ಸಣ್ಣಕ್ಕೆ ಹೆಚ್ಚಿದ ಹಸಿಮೆಣಸಿನಕಾಯಿ
1 ಚಮಚ ಅರಿಸಿನ
1 ಚಮಚ ಅಚ್ಚಮೆಣಸಿನಪುಡಿ
1 ಚಮಚ ಶುಂಟಿ-ಬೆಳ್ಳುಳ್ಳಿ ಪೇಸ್ಟ್
1 ಚಮಚ ಜೀರಿಗೆ
1 ಚಮಚ ಅಜ್ವಾನ
2 ಚಮಚ ಬಿಳಿ ಎಳ್ಳು
1 ಚಿಟಿಕೆ ಇಂಗು
1 ಚಮಚ ಸಕ್ಕರೆ
ರುಚಿಗೆ ತಕ್ಕಷ್ಟು ಉಪ್ಪು
ಎಣ್ಣೆ ಬೇಯಿಸಲು



ಮಾಡುವ ವಿಧಾನ
ಮೇಲೆ ಹೇಳಿದ ಎಲ್ಲಾ ಸಾಮಗ್ರಿಗಳನ್ನು ಸ್ವಲ್ಪ ನೀರಿನೊಂದಿಗೆ ಸೇರಿಸಿ ಚಪಾತಿ ಹಿಟ್ಟಿನ ಹದಕ್ಕೆ ಕಲಸಿಕೊಂಡು ಚನ್ನಾಗಿ ನಾದಿ, ಅರ್ದ ಗಂಟೆ ನೆನೆಯಲು ಬಿಡಿ. ನಂತರ ಚಪಾತಿಗಿಂತ ಸ್ವಲ್ಪ ತೆಳ್ಳಗೆ ಲಟ್ಟಿಸಿ, ಕಾವಲಿಯ ಮೇಲೆ ತುಂಬ ಎಣ್ಣೆ ಹಾಕಿ ಬೇಯಿಸಿದರೆ (shallow fry) ಥೇಪ್ಲ ರೆಡಿಯಾಗುತ್ತದೆ. ಎಣ್ಣೆ ತಿನ್ನಲು ಇಷ್ಟಪಡದವರು ಚಪಾತಿಯಂತೆ ಬೇಯಿಸಿಕೊಳ್ಳಬಹುದು.

ಥೇಪ್ಲಾವನ್ನು ಮೊಸರು, ಬೆಳ್ಳುಳ್ಳಿಚಟ್ನಿ, ನಿಂಬೆಕಾಯಿ ಉಪ್ಪಿನಕಾಯಿ ಜೊತೆ ತಿನ್ನಬಹುದು. ಅದೆನು ಇಲ್ಲದಿದ್ದರೆ ಹಾಗೆಯೆ ತಿನ್ನಬಹುದು.

ಥೆಪ್ಲವನ್ನು ಹಲವಾರು ಬಗೆಯಲ್ಲಿ ತಯಾರಿಸಬಹುದು. ಸಜ್ಜೆ ಹಿಟ್ಟು ಸಿಗದೆ ಇದ್ದಲ್ಲಿ ೨ ಕಪ್ ಗೋದಿಹಿಟ್ಟಿಗೆ ೨ ಚಮಚ ಸಣ್ಣ ರವೆ, ೧ ಚಮಚ ಕಡ್ಲೆಹಿಟ್ಟು ಸೇರಿಸಿಕೊಂಡು ಮಾಡಬಹುದು.